عمران خان نے 8 مارچ کو شکست تسلیم کرلی تھی جب ہم عوام کے ساتھ اسلام آباد پہنچے’

وزیر بلدیات سندھ ناصر حسین شاہ نے کہا ہے کہ عمران خان نے 8 مارچ کو شکست تسلیم کرلی تھی جب ہم عوام کے ساتھ اسلام آباد پہنچے۔تفصیلات کے مطابق ناصر حسین شاہ نے سماجی رابطے کی ویب سائٹ ٹوئٹر پر اپنے جاری کردہ ایک بیان میں عمران خان کے ٹوئٹ پر ردِ عمل دیتے ہوئے کہا کہ اعداد و شمار سے ہٹ کر یہ ٹوئٹ ایک بہت بڑا اعتراف ہے بلاول صاحب کی کامیابی کا کہ جب انھوں نے کہا تھا کہ سیلیکٹڈ کا راج اُسی دن ختم ہوجائے گا جس دن ہمارا عوامی مارچ اسلام آباد پہنچے گا۔

ان کا کہنا تھا کہ اس سے واضح ہے کہ خان نے 8 مارچ کو شکست تسلیم کر لی تھی جب ہم عوام کے ساتھ اسلام آباد پہنچے۔واضح رہے کہ چیئرمین پی ٹی آئی اور سابق وزیر اعظم عمران خان نے سماجی رابطے کی ویب سائٹ ٹوئٹر پر اپنے جاری کردہ ایک بیان میں کہا تھا کہ ڈالر 193 روپے کا ہوگیا ہے، 8 مارچ کو ڈالر 170 روپے کا تھا۔انہوں نے کہا کہ اسٹاک مارکیٹ 3 ہزار پوائنٹس گر چکی ہے، جنوری 2020 کے مقابلے میں افراط زر 13 اعشاریہ 4 فیصد ہوچکی، موجودہ صورتحال سے ظاہر ہے مارکیٹ کا امپورٹڈ حکومت پر اعتماد نہیں ہے۔

چیئرمین پی ٹی آئی اور سابق وزیر اعظم عمران خان کا مزید کہنا تھا کہ مارکیٹ پالیسی کا انتظار کر رہی ہے جس میں امپورٹڈ حکومت ناکام ہوچکی ہے، شوکت ترین اور میں نے نیوٹرلز کو خبردار کیا تھا کہ سازش کامیاب ہوئی تو معیشت ڈوب جائے گی۔