‘عمران خان صاحب! بلوچستان جائیے وہاں کے لوگ مر رہے ہیں’

نامور ڈرامہ و فلم رائٹر خلیل الرحمان قمر اکثر وبیشتر ملکی سیاسی و معاشی حالات پر سوشل میڈیا کا استعمال کرتے ہوئے اپنے خیالات کا اظہار کرتے رہتے ہیں۔اس مرتبہ بھی انہوں نے ٹوئٹر پر سابق وزیر اعظم عمران خان کو ایک مشورہ دیا ہے ، کیونکہ وہ چاہتے ہیں کہ عمران خان اس مشکل وقت میں بلوچستان پر توجہ دیں۔خلیل الرحمان قمر نے اپنی ٹوئٹ میں لکھا کہ عمران خان صاحب! بلوچستان جائیے وہاں کے لوگ مر رہے ہیں۔

واضح رہےکہ بلوچستان میں مسلسل تیز بارشیں ہونے کے بعد پیدا ہونے والی سیلابی صورتحال سے وہاں اموات کی تعداد میں مسلسل اضافہ ہو رہا ہے جبکہ سیلاب میں بچوں کے ڈوبنے کی تصاویر اور ویڈیوز نے لوگوں کے دل بھی دہلا دیے۔صوبے میں شدید بارشوں کے بعد ہونے والی سیلابی صورتحال پر 27 اور 28 جولائی کو ٹوئٹر پر ’خاموش انتظامیہ اور ڈوبتا بلوچستان‘ سمیت دیگر ہیش ٹیگ بھی ٹرینڈ پر رہے، جس میں لوگ بلوچستان میں بارشوں کی تباہ کاریوں کی ویڈیوز اور تصاویر شیئر کرتے رہے۔صوبے میں سیلابی صورتحال کے بعد بلوچستان کے وزیر اعلیٰ میر عبدالقدوس بزنجو نے اپنا لندن کا دورہ بھی منسوخ کردیا جب کہ تمام سرکاری افسران کی چھٹیاں منسوخ کرتے ہوئے صوبے میں ہنگامی حالات کے نفاذ کا اعلان کیا۔